Gaman og bráhollt!

Kæra dagbók nú brosir prinsessan eftir að hafa fengið þessar fínu kveðjur, jafnvel almúga fólk er farið að senda fyrirfólkinu kveðjur . Prinsessan og hennar kærasti þakka líka fyrir allar góðu fyrirbænirnar og ekki verra að fá meira af þeim (frekjan í fyrirfólkinu) . Kærustuparið veit að allar fyrirbænir og góðar hugsanir hafa áhrif, fyrir utan hvað þær eru bráðhollar fyrir alla aðila.

 Prinsessan er með "Letina" í heimsókn í dag og hún er eflaust góður gestur sé hún ekki of oft í heimsókn en frú Leti kemur stundum í kaffi og þá er nú illmögulegt að gera eitthvað annað en sinna henni (svolítið frek á athygli þessi elska). Prinsessan hefur nú frétt af Frú Leti í öðrum húsum eftir áramót og hefur hún jafnvel gert svo víðreist að sögur fóru af því að hún hafi mætt í kaffi í ónefnt hús við ána á Selfossi þannig að prinsessan sér að Frúin þarf að "vísitera" víða svo ekki getur hún stoppað lengi við í prinsessuhúsum .

Nú þarf kærastinn að vinna á sýkingu sem er í lokuðu hólfi við lungun og grunur leikur á að þessi sýking sé komin nokkuð til ára sinna þar sem hún sést á myndum allt frá því í Svíþjóð 2009. Það er eins og aldrei hafi fullkomlega komist fyrir þessa sýkingu og ekki er afgerandi hvort þarna leynist bæði sveppur og bakteríur eða "bara" bakteríur þannig að kærastinn fær lyf við hvorutveggju og svo er fylgst vel með .

Prinsessan; þessi þolinmóða, er búin að fá alveg nóg af kuldanum á Íslandi og finnst nú alveg nóg komið og ætlar að fara fram á örlitla hlýnun, bara svona þannig að hún geti keyrt sjálf á milli staða án þess að setja "náungann" í lífshættu og geti gefið einkabílstjórunum frí . Alltof lengi hefur hún þurft að fara innpökkuð í heitan bíl hjá einkabílstjórum til að geta kysst kærastann á sjúkrahúsinu og síðan að láta sækja sig til að geta farið heim að knúsa Jón sætasta. Það er ekki lítið lagt á eina prinsessu að þurfa að sinna þessum tveimur sætu. Sem betur fer var prinsessan búin að koma sér upp syni og dóttur á fullorðins aldri sem geta hlaupið undir bagga með að knúsa Jón og létta lund kærastans með heimsóknum fyrir utan að skutlast með prinsessuna á milli staða  .

Bless kæra dagbók og bestu kveðjur og takk fyrir að fylgjast með kærustuparinu og senda þeim góðar hugsanir og fyrirbænir .

Athugasemdir

[Erla Birgis (IP-tala skráð) 23.1.2012 kl. 18:06]

Gaman að lesa skrifin þín vinkona, vona að allt fari nú uppávið hjá ykkur aðalfólkinu, bið að heilsa frú Leti ef hún bankar hjá þér aftur en endilega segðu henni að hún sé ekki velkomin í Húsið við ána í bráð, húsbóndinn hér var að fá stórt verkefni og hefur ekki tíma og þá þarf ég víst að fara að sinna búðunum ein, ferlegt alveg .  Knús frá árbakkanum

[Erla Birgis (IP-tala skráð) 5.2.2012 kl. 15:09]

Hvernig er það með þig prinsessa, á ekkert að fara að pikka inn línur, vona að allt gangi betur hjá ykkur. Kveðja úr sveitinni