Ekki miklar eða stórar fréttir af prinsessunni nema hvað hún hefur töluvert fundið fyrir bauninni að undanförnu en þá hefur tengdamamma hennar komið og skutlað kæratanum á sjúkrahúsið til að það myndist ekki lognmolla þar . Kærastinn sér nefnilega til þess að læknar og hjúkrunarfólk á þessum bæ hafi eitthvað að sýsla. Komið hefur í ljós að sveppasýkingin hans sést hér á svona fimm ára fresti og hefur hingað til verið afar illviðráðanleg en þökk sé framförum og rannsóknum í læknavísindum þá er nýkomið lyf á markaðinn sem hrekkir þennan svepp. Annað hvort lætur sveppurinn alveg undan eða hylkið hans lokar sig af og verður ekki til meiri vandræða. Síðasta sneiðmyndataka af lungum kærastans (sveppahylkið liggur þétt við lungun) sýndi að sveppurinn var á hröðu undanhaldi og svo er bara að sjá hverju framvindur. Kærastinn er töluvert slappur og ekki til stórræðanna en finnur sér alltaf eitthvað til dundurs á milli hvílda og vinnur að eigin uppbyggingu .

Jón er óðum að jafna sig af mjaðmabrotinu en það var alveg við hryggjarsúluna þannig að erfitt var við að eiga. Dvölin í hundabúrinu skilaði þó sínu vel þó að aðrir heimilismeðlimir hafi átt erfitt með að horfa upp á litla eftirlætið reyna að naga sér leið út úr búrinu, það hélt þó og er enn heilt. Jón losnaði úr prísundinni í áföngum og var farinn að skokka um og leika við mýsnar (keyptar í kuffulaginu) þegar stóri frændi tók eftir "gúlp" miklum eða vökvafyllingu undir húð við hægri afturfót á Jóni. Jón var drifinn til lækningakonunnar sem skoðaði hann vel og vandlega og boðaði í aðra komu morguninn eftir. Jón mætti klukkan 0800 að staðartíma með mömmunni sinni og stóra frænda og varð að "leggjast" inn til sýnatöku og rannskóknar . Rétt fyrir hádegi hringdi dýralæknirinn í ömmuna og sagðist hafa sogið 80 ml af glærum vökva úr læri Jóns, líklegast taldi hún að þetta væru afleiðingar af högginum sem hann fékk þegar hann brotnaði en þó þarf að fylgjast með honum. Jón var líka drifinn í röntgenmyndatöku og þar kom í ljós að brotið hafði gróðið vel svo að þessar erfiðu vikur hafa borgað sig .

Þar sem Jón var svæfður við þessar aðfarir þá var tækifærið nýtt og sett í hann örflaga til merkingar þannig að nú er hann merktur í bak og fyrir, með nafnspjald lafandi í ól, tattú í eyranu og örflögu undir húð . Mikið var samt erfitt fyrir Jón að ganga og borða þegar hann kom heim, afturfæturnir létu engan veginn að stjórn og hann missti matinn stöðugt út úr sé enda afar vankaður og að lokum lagðist hann ofan á "afann" sinn sem lá upp í sófa og þar sváfu þeir saman góða stund .

Jæja kæra dagbók prinsessan heldur áfram í baráttunni með kærastanum og bíður eftir vorinu eða öllu heldur hærri lofthita . Kærustuparið þakkar allar góðar fyrirbænir og parinu þætti vænt um að þeim yrði haldið áfram, takk!

Bless kæra dagbók og vonandi verður einhver dugur í prinsessunni til skrifa svona með hækkandi hitastigi og bjartari dögum . 

Síðustu dagar hafa verið afar sögulegir hjá prinsessunni, litlu börnin fengu sömu flensu og pabbinn þeirra en voru misslæm og eru að ná sér . Tengdapabbi prinsessunnar var fluttur með svona "very expensive leigubíl" á bráðavaktina í Fossvogi og lagður þar inn en er allur að jafna sig og er komin heim að laga sér kaffi nú er bara að hann fari vel með sig.

Jón Leifs eðalköttur skreið á framlöppunum heim í gærkvöldi . Mamman hans gaf honum verkjalyf sem enn voru til eftir síðustu meiðsl. Þegar prinsessan kom heim var Jón í sínu bæli og dormaði svo prinsessan fór í sitt bæli en rumskaði nokkru sinnum í nótt þegar Jón litli var að væla og stynja . Prinsessan var mætt á hurðahúninn hjá dýralækninum með Jón við opnun í morgun og þurfti að skilja litla engilinn sinn eftir. Dýralæknirinn kvaddi með þeim orðum að þetta liti ekki vel út þannig að prinsessan var með athyglisbrest á hæðsta stigi meðan hún beið eftir símtali frá dýralækninum. Loksins klukkan hálf ellefu hringdi  læknirinn og Jón reyndist mjaðmagrindarbrotinn, mjaðmagrindinn hafði losnað frá hrygg og ekkert hægt að spengja nema þannig að Jón yrði fatlaður á eftir eða jafnvel verra . Eina ráðið er að halda Jóni (hreyfiglaða) í bælinu næstu tvær vikurnar að minnsta kosti þ.e. hafa hann í stóru búri þar sem bæli, matur og klósett ásamt Jóni kæmist fyrir. Jón má sem sé ekki hopap upp á neitt né niður af neinu .Prinsessan fékk búr sem ætlað er fyrir stóran hund, t.d. labrador, fyrir Jón, náði síðan í litlu elskuna til dýralæknisins. Jón var útgrátinn, já tár og allt og sýndi viðbrögð þegar amman mætti og dýralæknirinn hafði á orði að auðséð væri að hann væri dauðfegin að hitta ömmuna sína. Núna er Jón í búrinu sínu og var að gæða sér á rækjum þegar amman fór að sinna kærastanum. Að sjálfsögðu er Jón ekki einn heima, mamman hans og stóri frændi voru bæði kyrrsett til að vera til taks ef Jón þyrfti að kvarta og til að verða við óskum hans .

Núna situr prinsessan á sjúkrahúsinu hjá kærastanum og fylgist með fréttum með öðru eyranu en horfir ekki. Kærastinn hefur áhyggjur af Jóni litla sem er einn heim með mömmu sinn og frænda, engin afi og amma að hugsa um hann .

Bless kæra dagbók og næst verða fréttirnar örugglega betri og bjartari af prinsessunni og hennar háaðli .

 Prinsessan er með "Letina" í heimsókn í dag og hún er eflaust góður gestur sé hún ekki of oft í heimsókn en frú Leti kemur stundum í kaffi og þá er nú illmögulegt að gera eitthvað annað en sinna henni (svolítið frek á athygli þessi elska). Prinsessan hefur nú frétt af Frú Leti í öðrum húsum eftir áramót og hefur hún jafnvel gert svo víðreist að sögur fóru af því að hún hafi mætt í kaffi í ónefnt hús við ána á Selfossi þannig að prinsessan sér að Frúin þarf að "vísitera" víða svo ekki getur hún stoppað lengi við í prinsessuhúsum .

Nú þarf kærastinn að vinna á sýkingu sem er í lokuðu hólfi við lungun og grunur leikur á að þessi sýking sé komin nokkuð til ára sinna þar sem hún sést á myndum allt frá því í Svíþjóð 2009. Það er eins og aldrei hafi fullkomlega komist fyrir þessa sýkingu og ekki er afgerandi hvort þarna leynist bæði sveppur og bakteríur eða "bara" bakteríur þannig að kærastinn fær lyf við hvorutveggju og svo er fylgst vel með .

Prinsessan; þessi þolinmóða, er búin að fá alveg nóg af kuldanum á Íslandi og finnst nú alveg nóg komið og ætlar að fara fram á örlitla hlýnun, bara svona þannig að hún geti keyrt sjálf á milli staða án þess að setja "náungann" í lífshættu og geti gefið einkabílstjórunum frí . Alltof lengi hefur hún þurft að fara innpökkuð í heitan bíl hjá einkabílstjórum til að geta kysst kærastann á sjúkrahúsinu og síðan að láta sækja sig til að geta farið heim að knúsa Jón sætasta. Það er ekki lítið lagt á eina prinsessu að þurfa að sinna þessum tveimur sætu. Sem betur fer var prinsessan búin að koma sér upp syni og dóttur á fullorðins aldri sem geta hlaupið undir bagga með að knúsa Jón og létta lund kærastans með heimsóknum fyrir utan að skutlast með prinsessuna á milli staða  .

Bless kæra dagbók og bestu kveðjur og takk fyrir að fylgjast með kærustuparinu og senda þeim góðar hugsanir og fyrirbænir .

Í lok október lést mamma prinsessunnar en það hryggði prinsessuna þó að  "drottningin" hafi verið orðin afar þreytt á líkama. Alltaf gat prinsessan leita ráða og rætt hlutina við mömmuna sína en hún var djúpvitur kona og gaf góð rá, hvert á prinsessan að leita í dag . Margar minningar og hugsanir skjóta upp þegar fólk fellur frá og ekkert var öðru vísi hjá prinsessunni, mamman hennar hefði orðið 88 ára 15. desember síðastliðin hefði hún lifað.

Prinsessan á hins vegar góðar og fallegar minningar um mömmu sína og þær verða ekki teknar frá henni, ekki frekar en góðu ættingjarnir.

Kærastinn stendur enn í baráttunni við bráðahvítblæðið og hefur tekið margar hliðarbeygjur og útúdúra, alltaf að ljá læknunum verðug verkefni þeim til reynsluauka! Nú síðast fékk kærastinn gat eða göt á görnina og þurfti að fara í aðgerð sem reyndar gékk vonum framar og var hluti ristilsins, hægra meginn, numin brott en þetta á allta að jafna sig. Nú er bara að drífa sig í að klára hvítblæðið og fara að halda áfram þaðan sem frá var horfið við að dekra kærustuna .

Prinsessan hefur litlu börnin sín enn heima en þau eru í Háskóla Íslands að nema erlend tungumál sér til gangns og vonandi nokkurs gamans, þau eru einnig með smá vinnu með skólanum til að eiga fyrir stöku bíóferð. Jón Leifs er enn mjög ánægður með ömmu sína, prinsessuna á bauninni, nýtir reyndar hvert tækifæri sem gefst til að skríða upp í á meðan kærastinn er á sjúkrahúsinu og spurning hvar kærastinn sofi þegar hann kemur heim . Heitir þetta ekki að það sé kominn köttur í ból kærastans?

 Jæja kæra dagbók vonandi verður prinsessan duglegri að láta heyra frá sér á næstunni þó hún sé enn önnum kafin við að lesa "jólabækurnar" . Bless kæra dagbók

Kærustuparið fékk í gær fyrstu góðu fréttirnar síðan um áramót af sjúkdómi kærastans . Hann byrjaði á nýjum lyfjum, þessi meðferð hefur ekki verið reynd á Íslandi áður og er í raun nýkomin úr prufukeyrslu erlendis. Á fimmtudaginn var tekinn mergástunga og svarið kom á föstudag "Tosast í rétta átt, þó sjúkdómurinn sé enn til staðar." Þó er kærastinn bara hálfnaður með fyrstu umferð svo kærustuparið er ánægt.

Prinsessan hefur allt frá byrjun dagbókarfærslna af henni íhugað hvort hún ætti að hafa dagbókina opna eða lokaða eða hvort hún yfirhöfuð að vera að láta út einhverjar fréttir af sér og sínum. Prinsessan ætlar að taka sér nokkra daga í að íhuga hvor kosturinn verður fyrir valinu, þ.e. loka eða hætta.

Prinsessan biður alla þá sem hún hefur sært eða fengið til að misskilja fréttir af kærastanum innilega afsökunar. Þetta hefur verið mjög erfitt stríð og afskaplega gott já alveg ótrúlega uppörvandi að fá kveðjur frá vinum og vinnufélögum í gegnum dagbókina. Það hefur í raun verið ástæðan fyrir færslunum að vita af því að einhver fylgist með manni. Eins hefur verið ótrúlega gott hvað vinir hafa verið duglegir að bjóða í mat en það hefur létt lundina og eins hafa góðar sendingar borist sem er alveg ómetanlegt, kærustuparið þakkar innilega fyrir sig .

Bless kæra dagbók .

Prinsessan hefur kærastann að mestu heima hjá sér þessa dagana og er hann  að jafna sig eftir lugnabólgu og veikindi undanfarna mánuði og síðan er það áframhaldandi barátta við hvítblæðið.

Jón Leifs alias ormur er nokk til friðs þessa dagana og virðist mjög ánægður með það að hafa ömmu og afa heima flesta daga og svo skokkar hann í göngutúra með parinu .

Prinsessan hélt til höfuðborgarinnar á þriðjudaginn og varð sér úti um Skólastjórasúpu (ekki það að sú staða sé markmiðið) og kaffi og súkkulaði í eftirrétt. Þar hitti prinsessan eiturhressar "bókhaldsdömur" sem þó minntust hvorki á debet né kredit. Þessar dömur eru ótrúlega jákvæðar og hressar þrátt fyrir að hafa verið atvinnulausar um lengri tíma og reynt af fremsta megni að lifa á bótum þær hafa verið duglegar að sækja hin ýmsu námsskeið og jafnvel að leika í kvikmyndum eða sjónvarpsþáttum . Alla vega hafði prinsessan mjög gott af því að hitta þessar skvísur og á áætlun er að neyða þær hingað út á landsbyggðina og hver veit nema boðið verði upp á "atvinnubóta" súpu eða bara kaffi .

Nú er prinsessan hins vegar að fá flotta dömu í kaffi, þessi dama gerir ekkert annað en að safna barnabörnum þessa dagana .

Klukkan fimm ætlar svo prinsessan ásamt frumburðinum til höfuðborgarinnar og þar ætla þau að fylgjst með einkadótturinni að taka þátt í módelfitness en prinsessan vakanði fyrir allar aldir í morgun og málaði dótturina dökk brúna á allan kroppinn .

Bless kæra dagbók og bestu kveðjur frá kærustuparinu sem reynir að fara í þrjá örstutta göngutúra á dag (á milli hryðja) og vinnur hörðum höndum að uppbyggingu sem gengur bara vel . 

Prinsessan hefur kærastann heima hjá sér núna og fengu þau mjög góða gesti í hádegiskaffi en þá var kærustuparið búið að mæta á kjörstað og gera sínum atkvæðum góð skil. Fámennt og nokkuð góðmennt var á kjörstað upp úr klukkan 09:00 á "Greenwitch time" en eitthvað átti konan sem kaus næst á undan kærustuparinu erfitt. Prinsessan er ekki alveg með á hreinu hvort hún kaus rétt eða rangt, enda bannað að nota sömu orð á kjörstað í dag og bönnuð eru í "Frúnni í Hamborg" svo ekki þorði prinsessan að spyrja, vildi ekki fá lögreglufylgd út af kjörstað . Alla vega þessi kvenmaður tók sig til og hnerraði þrisvar með miklum tilþrifum þegar hún hugðist stinga atkvæðaseðlinum ofan í kjörkassann, prinsessunni varð á orði (talandi út frá eigin reynsluheimi) "þú ert með ofnæmi fyrir kjörseðlinum". Kvenmaðurinn dreif sig í að troða seðlinum í rifuna og tók á rás út, prinsessan var að hugsa um að hlaupa á eftir henni og spurja hvað hún hefði kosið, þar sem líklegasta skýringin á hnerrunum er að hún hafi kosið rangt .

Bless kæra dagbók og bestu kveðjur frá kærustuparinu sem hefur það gott saman og ætlar að fá gott að borða í kvöld og meira að segja rauðvín með og jafnvel að ná að vaka eitthvað yfir kosningarsjónvarpinu .

Prinsessan hefur verið nokkuð til friðs undanfarna daga og ætlar að vera það fram yfir helgi. Prinsessan er svo heppin að kærastinn er hitalaus og fær því að vera heima um helgina og líka að gista . Hann kom heim seinnipartinn í gær með fullan poka af lyfjum og á morgnanna mætir hjúkrunarfræðingur og gefur kærastanum lyf í æð en að öðru er hann nokkuð laus við en þó ekki til stórræðanna. Hins vegar hefur kærustuparinu verið boðið í mat hjá góðum vinum í kvöld og ætla þau að þekkjast boðið í þeirri von að börnin verði heima að passa Jón, ekki er hægt að skilja hann einan eftir .

Bless kæra dagbók og bestu kveðjur frá kærustuparinu .

Bless kæra dagbók og bestu kveðjur frá kærustuparinu .

Svo einhverjar fréttir berist af kærastanum þá er hann á veika tímabilinu, fær háan hita og hitalækkandi til skiptis og er á mjög breiðvirkum sýklalyfjum, hitatoppunum hefur fækkað í dag og líklegt að lyfin séu að vinna á sýkingum. Þetta er svo sem eins og það á að vera en samt þreytandi til lengdar .

Kærustuparið er búið að endurheimta einkasoninn og frumburðinn (einn og sami maðurinn) frá henni "Emeríku" . Barnið hefur verið að heiman í tvo mánuði við kvikmyndatökur, fyrst í Evrópu og síðan handan Atlantshafsins. Kvikmyndina vinnur hann ásamt vinum sínum og fellur hún í flokk fræðslu- eða fréttamynda. Félagarnir hafa átt viðtöl við málsmetandi menn um stjórnarfar, stjórnmál, lýðræði og fleira. Mjög ólík sjónarhorn og menn með ótrúlega ólíkan bakgrunn koma fram í þessum viðtölum og verður forvitnilegt að sjá útkomuna .

Af Jóni er það að frétta að hann er við hestaheilsu og sýnir "bíbí" heldur mikinn áhuga þessa dagana .

Heimasætan ætlar að synga fyrir gesti og gangandi á Café Rosinberg í höfuðborginni í kvöld og þangað ætlar prinsessan að mæta vopnuð vídéó-upptökuvél. Þetta er hluti af útskrift hennar frá Kvikmyndaskólanum en þeir nemendur sem útskrifast í vor frá leiklistadeildinni koma fram og skemmta gestum með söng frá klukkan níu í kvöld .

Bless kæra dagbók og bestu kveðjur frá kærustuparinu sem vinnur nú hörðum höndum að því að komast í stand að nýta pakkann góða .

Kærustuparið beið í nokkra daga eftir að kærastinn fengi hita (gasalega spennt!) því það er partur af "pógrammet" og nú er hann sem sé kominn með hita ekki mjög háan sem betur fer og er komin á sýklalyf. Kærastinn er í mjög góðum höndum og vel er fylgst með honum því enginn vill að hann fái svona slæma lungnabólgu eins og síðast nú er bara að vera þolinmóður næstu vikurnar og leyfa þessari umferð að klárast og vonandi án allra vandkvæða svona til tilbreytingar .

Kærustuparið er rosalega spennt í dag, kannski eru þau að reskjast, von er nefnilega á frumburðinum og einkasyninum heim á morgun, hann verður sem sé endurheimtur frá henni "Emerríku". Hann hefur verið við kvikmyndagerð í Evrópu og Amerríku síðustu tvo mánuði og síðan á að vinna eftirvinnuna hér heima.

Dagurinn í dag er líka merkisdagur hjá fjölskyldunni þar sem að Jón Leifs "alias" Jón Ormur á afmæli í dag, barnabarnið er sem sé eins árs og virðist bera aldurinn nokkuð vel. Hann rauk á fætur klukkan 05:31 í morgun eða við fyrsta tíst í vekjaraklukku mömmu sinnar en hún er vön að fara í ræktina fyrir skóla á morgnana. Jón vildi strax fá sína þjónustu, mat og fá að skreppa aðeins út á þak, þ.e. hann fer út um svefnherbergisgluggan og lýtur eftir lífinu af þakinu á sólskyggninu . Núna vildi svo til að hin "einstæða móðir" ákvað að sleppa ræktinni og hvíla sig áfram en svona útúrsnúningar eiga ekki við hann Jón svo hann vældi af hneykslan og heimtaði að rétt röð á réttum tíma væri í heiðri höfð. Þar sem móðirin haggaðist ekki þá sá "amman" aumur á afmælisbarninu og hleypti honum út á þak, þar sem hann sat dágóða stund og horfðist í augu við hrafn einn vígalegan sem sat á næsta ljósastaur, hrafninn lét undan og flaug sína leið og í staðinn komu litlir sætir þrestir og þá þótti "ömmunni" vissara að fara niður og næra afmælisbarnið áður en hann bjargaði sér sjálfur .

Prinsessan er svona að velta því fyrir sér að mæta á vorfagnað í kvöld, þar sem dugmiklar konur úr golfklúbbi Keilis ætla að fagna vorkomu í "BLING" útbúnaði, vorið er nefnileg að byrja að tylla sér og því um að gera fyrir svona prinsessu að fagna því . "Hin einstæða móðir" hefur meira að segja boðist til að aka prinsessunni báðar leiðir.

Bless kæra dagbók og bestu kveðjur frá kærsutuparinu og vonandi að ALLIR muni eftir að slaka á og njóta tímans sem er .

Góðan daginn kæra dagbók  þá er kærastinn byrjaður á nýrri törn. Hann er hress og íþróttaálfurinn kemur daglega og fær sér göngutúr með kærastanum og síðan eru það nokkrar styrktaræfingar. Annað með prinsessun sem eltist við Ágústu Johnson á morgnana heima í stofu og eitthvað gengur Ágústu illa að halda takti og svo kann hún heldur ekki að telja. Já prinsessan er búin að finna þetta út því þegar prinsessan gerir æfingarnar þá er Ágústa alltaf á undan og svo segir Ágústa "og 2 í viðbót" og gerir svo fjóra, "common" .

Prinsessan er búin að ákveða að vorið komi eftir helgi, prinsessan er að tala um íslenskt vor . Það er hret öðru hvoru en sjaldan og að mestu hlýnandi veður og páskaliljur að springa út . Prinsessan vill fara að komast á kaffihú,s hitta fólk og í göngutúr(a) enda prinsessunni í "barnsminni" hvernig það er að fara út að ganga. Prinsessan hefur líka hug á að komast í ræktina því ef satt skal segja þá er það henni töluvert erfitt að horfa upp á hana Ágústu á hverjum morgni og aumingja Jón liggur skelfingu lostinn uppí "ömmurúmi" á meðan ósköpin ganga yfir .

Tengdamóðir prinsessunnar fór ásamt hinum syninum og fjölskyldu í "íþróttaferð" til Siglufjarðar um daginn og í fyrstu hafði prinsessan svolítlar áhyggjur af þessari ferð. Prinsessunni var nefnilega hugsað til æskuáranna þegar hún sjálf dvaldi oft á Siglufirði undir því yfirskini að heimsækja ættingjana. Prinsessan hafði alltaf í öruggt hús að venda en hún vissi nú samt til þess að sumt aðkomufólk þurfti að gista á tjaldistæði sem var staðsett inn í firði. Sem betur fer fékk tengdamamma hús til afnota og þurfti ekki að nýta sér tjaldsvæðið svo áhyggjur voru óþarfar   í bili alla vega.

Tjalstæði þetta lá við berjaland og þangað ákváðu frænka (reyndar gift föðurbróður) og móðir prinsessunnar að halda einn daginn og týna ber í sultu og saft . Í einhverju bjartsýnistkasti þeirra mákvenna þá álitu þær að dæturnar á svipuðum aldri væru upplagðar í að hjálpa til við berjatýnsluna, ja það sem fullorðnu fólki getur dottið í hug  . Eftir að ungu frænkurnar höfðu náð að botnfylla sín ílát þá ákváðu þær að nú væri nauðsynlegt að bregða sér á kamarinn á tjaldsvæðinu. Ja þvílíkur töfrakamar!!! Þarna voru fjórir samfastir kamrar/klefar sem lágu við árbakka ofan á láréttum staurum en staurarnir lágu þvert yfir ána, frá einum bakka til annars. Svo "skemmtilega" var kömrunum fyrirkomið að allt sem menn létu frá sér á kamrinum féll beint ofan í ána og auðvelt að sjá hvað niður féll. Þetta voru frænkurnar fljótar að uppgötva og skemmtu sér við að fylgjast  með hvað kom frá hvor annarri og svo eins hverju þær hentu niður í gengum kamarinn, eitthvað reyndu þær líka að fá ferðafélagana til að athafna sig á kamrinum en undirtektir voru afar dræmar. Skemmst er frá því að segja að prinsessan gékk hölt nokkra mánuði eftir að hafa misstigið sig af spenningi við að hlaupa að ánni til að sjá hvað kæmi niður og þegar prinsessan var um fertugt var reynt að gera við þessi meiðsl því ristarbein hafði brotnað og ekki lagað strax enda ekki hægt að kvarta of mikið yfir "kamarmeiðslum" . Það er hins vegar af frænkunni að segja að hún lagðist daginn eftir í 40 stiga hita , kvef og hálsbólgu og var hás í mörg ár á eftir og gott ef hún er það ekki enn í dag. Er það nema von að prinsessan hafi haft áhyggjur af tengdamömmunni .

Bless kæra dagbók, kærustuparið situr á sjúkrahúsinu og dundar við lestur, prjónaskap og tölvuleiki en prinsessan vonast til að fá kærastann í smá heimsókn heim yfir daginn einhverja næstu dagana .

Kærastinn er hitalaus síðan fyrir helgi og fékk meira að segja að koma í heimsókn heim síðustu þrjá daga í nokkra klustundir í senn en var kyrrsettur í dag vegna rannsókna á heilsufari. Prinsessan komst út í bíl í dag og hefur því setið á sjúkrahúsinu  og ekki nennt að gera neitt nema leika sér í tölvunni og skoða fréttasíður á netinu . Kærastinn fer í göngutúra og gerir æfingar með sjúkraþjálfara á sjúkrahúsinu til að byggja sig upp fyrir næstu törn en prinsessan reynir að gera æfingar heima í kuldanum. Prinsessan fékk meira að segja gefins DVD-disk þar sem Ágústa Johnson stjórnar æfingum af miklu kappi  Hún heldur hins vegar ekki alveg sama takti og prinsessan og prinsessu hægri er ekki sama og Ágústu hægri en þetta hefur þó gengið stórslysalaust fyrir sig,  einhverra hluta vegna heldur Jón sig alltaf á efri hæðinn þegar prinsessan "púlar".

Prinsessan ákvað í morgun að kíkja í tölvupósthólfið sitt og sat við það í rólegheitum en Jón sat í glugganum í eldhúsinu og mændi út á vonda veðrið. Eftir að prinsessan hafði lesið nokkra "pósta" heyrast torkennilegt hljóð úr eldhúsinu og prisnsessan stóð því upp til að aðgæta hvað væri þar í gangi; sat þá ekki grár penn köttur við kaffivélina og horfði í kringum sig, kotroskinn . Jón hinsvegar sat á eldhússtól og urraðí og kvæsti, allsendis óánægður með stöðuna, úr augum hans mátti lesa "hvað vilt þú upp á dekk, Grámann"! Kötturinn forðaði sér snarlega út um eldhúsgluggan þegar að prinsessan "ógurlega" gékk að honum og hvarf hann út í rigninguna og rokið án þess að kveðja eða þakka fyrir móttökurnar; dóninn! Jón stóð og var í viðbragðstöðu og horfði haukfráum augum út í regnið og róaðist ekki fyrr en prinsessan var búin að loka glugganum og klappa honum og knúsa vel . Jón var orðinn rólegur þegar að prinsessan hélt af stað inn á sjúkrahús og bjó hann sig undir að leggja sig fyrst að honum var ekki ætlað að fara með en var þá búin að elta prinsessuna um allt hús, þar sem hún lokaði öllum gluggum vel og vandlega .

Bless kæra dagbók og nú vonum við að það fari ekki að frysta verulega aftur þar sem að sýnt er að fingurnir á prinsessunni virðast frjósa í frostinu, bestu kveðjur frá okkur kærustuparinu .

Prinsessan er hins vegar fremur hress á líkama miðað við árstíma og er hundfúl yfir veðurspá næstu daga en spáin gerir ráð fyrir frosti eftir helgi . Veðurfarið hefur verið hagstætt að undanförnu þannig að prinsessan hefur getað farið alla daga til kærastans á meðan hann hefur legið veikur á sjúkrahúsinu og það finnst prinsessunni mjög gott og kærastanum reynda líka .

Að undanförnu hefur borið á áhyggjum varðandi uppeldi Jóns, svo rammt hefur kveðið að þessum áhyggjum að bróðir (lífvörður) prinsessunnar hafði orð á þessu í morgun . Síðasta mánuðinn hefur Jón nefnileg verið án "afa" og "frænda" þar sem þeir hafa verið fjarverandi vegna annarra verkefna, ólíkra þó. Jóni vantar sem sé alla karllega fyrirmynd í lífinu þessa dagana og áhyggjur eru uppi um það að hann fái of feminískt uppeldi . Prinsessan er nú á því að svona Jónar eigi að vera kelnir og að þeir eigi að njóta þess að láta klappa sér og klóra og fylgast svo vel með skúringum og þrifum svo að þeir geti orðið góðir "hreingjörninga eftirlítendur" . Jón er hins vegar ekki alveg nógu hress með fyrirkomulagið þessa dagana. Hann vill bara hafa sitt fólk heima, fer reglulega inn í herbergi frændans og gengur þar um og hoppar upp rúm og labbar svo niðurlútur út . Eins tekur Jón á móti "ömmu" sinni á hverju kvöldi, fær far inn í bílskúr og skoðar bílinn allan vel og vandlega að innan, "langamma" hans vill meina að hann sé að leita að "afa" sínum, allavega hengslast hann út úr bílnum eftir ítarlega skoðun og er ekkert kátur . Jón er hins vega þolinmóður og veit að það borgar sig að bíða og knúsar því konurnar í lífi sínu vel og vandlega, fylgir þeim eftir og sefur í sama herbergi og bíður eftir að karlmennirnir í hans lífi komi heim .

Bless kæra dagbók og nú vonar prinsessan að veðurfræðingunum bregðist nú bogalistin og að ekkert verði úr frostinu næstu dagana .

Prinsessan stóð í eldhúsinu sínu og undirbjó prinsessu morgunverð uppúr níu í morgun og barnabarnið, Jón, var í miklu stuði að elta Heiðu mús um alla stofu og fannst "ömmunni" heldur mikil læti í honum . Svo tók prinsessan eftir því að Jón sat upp á eldhússtól og horfði stórum augum á "ömmuna" sína og þá heyrðist í dótturinni á efri hæðinni; "mamma var þetta jarðskjálfti eða..." "nei, nei þetta var bar Jón með læti", " en mamma skápahurðarnar hrisstust". Þarna fór prinsessan að efast um sekt Jóns  og ákvað að kíkja á mbl.is og jú, jú þarna stóð jarðaskjálfti upp á allavega 3.9 með upptök sín við Krísuvík, Jón saklaus að þessu sinni. Þá fór prinsessan að rifja upp að hún hefði vaknað í nótt eða snemma í morgun við umgang og ákvað að það væru ekki innbrotsþjófar og snéri sér á hina . Prinsessan var varla sofnuð aftur þegar að einhver umgangur/skruðningar heyrðust aftur og þá hugsaði prinsessan ´ja hér er engu að stela nema úr svefnherberginu (mægurnar og Jón) og þá væri sko prinsessunni að mæta´  með það sofnaði prinsessan. Á mbl.is var hægt að lesa að þarna var það móðir jörð  að trufla nætursvefn prinsessunnar en prinsessan býr einmitt á hinni "illræmdu" jarðsprungu sem er sek af jarðahrisstingi nema að enn sé Loki að fá eiturdropana úr Miðgarðsormi yfir sig og skekur sig allan á meðan frúin losar skálina .

Bless bless kæra dagbók og kærustuparið þakkar fyrir allar góðu kveðjurnar og vonar að allir séu nokkuð hressir, líka þeir hárprúðu, bestu kveðjur af sjúkrahúsinu .